TRC: TRENI YA MWENDO KASI YA MIZIGO KUANZA MEI

📌Na Mwandishi wetu

Shirika la Reli Tanzania (TRC) limesema treni ya mwendo kasi ya mizigo itaanza kazi mwishoni mwa Mei 2025, ikihudumu kati ya Dar es Salaam na Dodoma.

Kaimu Mkurugenzi Mkuu wa TRC, Mhandisi Mateshi Tito, amesema tayari mabehewa 264 ya mizigo yamewasili nchini na kufanyiwa majaribio. 

Ametoa kauli hiyo wakati wa Mkutano Mkuu wa 39 wa Jumuiya ya Tawala za Mitaa (ALAT), ambapo wajumbe walishiriki katika ziara ya NMB ALAT SGR Royal Tour kati ya Dodoma na Dar es Salaam, chini ya udhamini wa Benki ya NMB.

Mhandisi Tito pia ameeleza kuwa tangu treni ya mwendo kasi ya SGR ianze safari zake Julai 2024, hadi Machi 2025, tayari imesafirisha abiria milioni mbili.

Afisa mkuu wa wateja wakubwa na serikali Benki ya NMB Alfred Shayo amesisitiza umuhimu wa Jumuiya ya Tawala za Mitaa katika kukuza uchumi wa nchi na wananchi mmoja mmoja.

Kutokana na hilo, wameamua kuwa wadhamini wakuu wa mkutano huo na kutumia Royal Tour hiyo kutoa elimu ya fedha kwa wajumbe wa ALAT, ili nao wawafundishe wananchi wanaowaongoza.