NHIF YAOKOA BILIONI 22 KUPITIA TEHAMA, YAPANUA HUDUMA ZA AFYA

📌BAHATI MSANJILA

Mfuko wa Taifa wa Bima ya Afya (NHIF) umefanikiwa kuokoa zaidi ya shilingi bilioni 22 kutokana na matumizi ya Teknolojia ya Habari na Mawasiliano (TEHAMA), hatua iliyodhibiti udanganyifu katika matumizi ya kadi za bima.

Kwa mujibu wa Mkurugenzi Mkuu wa NHIF, Dkt. Irene Isaka, mfumo wa TEHAMA umeimarisha uwajibikaji na uwazi, huku ukiwezesha wanachama kutambulika kwa kutumia namba ya utambulisho wa Taifa (NIDA) badala ya kadi za bima.

Aidha, matumizi ya TEHAMA yamerahisisha usajili wa wanachama, ambapo sasa mtu anaweza kujiandikisha popote alipo bila kulazimika kufika ofisi za NHIF. Pia, huduma za madai ya vituo vya afya sasa zinachakatwa kwa haraka zaidi, jambo ambalo limeongeza ufanisi wa Mfuko.

Kutokana na maboresho haya, NHIF sasa ina uwezo wa kujiendesha kwa mwaka mmoja na nusu, tofauti na hapo awali ambapo Mfuko ulikuwa na uwezo wa kujiendesha kwa miezi sita pekee.

Mbali na udhibiti wa udanganyifu, NHIF pia imefanikiwa kupanua huduma zake kwa kiasi kikubwa. Katika kipindi cha miaka minne ya Serikali ya Awamu ya Sita, Mfuko umesajili wanachama milioni 2.2 na kukusanya michango ya jumla ya shilingi trilioni 2.3.

Dkt. Isaka amebainisha kuwa asilimia 92 ya mapato hayo yanatokana na michango ya wanachama, jambo linaloonesha jinsi wananchi wanavyoendelea kuamini na kutumia huduma za NHIF.

Ili kuhakikisha wananchi wanapata huduma bora zaidi, NHIF imeongeza idadi ya vituo vya afya vinavyopokea kadi za bima hadi kufikia 14,000, vikiwemo vya Serikali na sekta binafsi.

Dkt. Isaka amewahimiza wananchi, hususan vijana, kujisajili katika mfuko huo ili kuhakikisha wanapata huduma za afya kwa urahisi, akibainisha kuwa asilimia 22 ya vijana wanakabiliwa na magonjwa yasiyo ya kuambukiza.