NMB YATWAA TUZO YA KIMATAIFA YA MWAJIRI KINARA, YAONGOZA AFRIKA MASHARIKI.

 📌BAHATI MSANJILA

BENKI ya NMB imekuwa taasisi ya kwanza ya kifedha Afrika Mashariki kutwaa tuzo ya Mwajiri kinara, Inayotolewa na taasisi ya kimataifa ya TOP EMPLOYER, na hivyo kuwa miongoni mwa taasisi 2400 duniani ambazo zimefanikiwa kupata tuzo hiyo.

Akiongea na waandishi wa habari wakati wa kutambulisha tuzo hiyo Afisa Mkuu rasilimali watu wa benki ya NMB Emmanuel Akonaay, amesema kigezo kikubwa kinachoangaliwa kwenye upataji wa tuzo hiyo ya kimataifa ya TOP EMPLOYER ni ustawi wa wafanyakazi wakiangalia zaidi utendaji kazi, mifumo na sera za taasisi husika upande wa rasilimali watu kama vinakidhi viwango vya kimataifa.

Bwana Akonaay amevitaja vigezo sita vinavyozingatiwa ili taasisi iweze kupata tuzo hiyo ya kimataifa ya TOP EMPLOYER , ambavyo ni mikakati ya taasisi husika kwa wafanyakazi wake, mchakato mzima unaotumika kwenye taasisi katika kuwapata wafanyakazi bora na uendelezaji wa wafanyakazi kwenye taasisi husika.

Vigezo vingine ni namna bora ya kuwatumia wafanyazi kulingana na uwezo na vipaji vyao kwa matokeo chanya ndani ya taasisi pamoja na usawa wa kijinsia kwa wafanyakazi na viongozi kwenye taasisi husika.

NMB kupata tuzo ya kimataifa ya TOP EMPLOYER inaifanya benki hiyo kuwa taasisi ya kwanza ya kifedha Afrika Mashariki kupata Tuzo hiyo, hivyo inakuwa miongoni mwa taasisi 2400 duniani ambazo zimefanikiwa kupata tuzo hiyo ambazo kwa ujumla wake zimeajiri wafanyakazi million 13.

Katika kudhihirisha benki ya NMB ni mwajiri bora, mwaka 2022 benki hiyo ilitambuliwa na chama cha waajiri Tanzania (ATE) kuwa mwajiri bora wa mwaka , mwaka 2023 benki ya NMB ilitangazwa na ATE kushika nafasi ya pili ya mwajiri bora na mwaka huo huo benki ya NMB ilitambuliwa kitaifa na kimataifa kuwa ni taasisi inayozingatia usawa wa kijinsia kwa wafanyakazi wa kawaida na utawala.