RIPOTI UTENDAJI KAZI MAMLAKA ZA MAJI,UZEMBE WATENDAJI BADO KIKWAZO

 

📌ALEX SONNA

MAMLAKA ya udhibiti wa huduma za nishati na maji hapa nchini UWURA leo Mei 11, 2021 imezindua ripoti ya tathmini ya hali ya utendaji kazi na utoaji huduma kwa mamlaka za maji hapa nchini ripoti inayolenga kuimarisha utoaji wa huduma za maji kwa wananchi.

Akizindua ripoti hiyo Waziri Mkuu wa Jamhuri ya Muungano wa Tanzania Mhe. Kassim Majaliwa amewataka watendaji katika mamlaka zote za maji ngazi zote hapa nchini kufanya kazi kwa kutanguliza uzalendo, uadilifu na weredi katika kazi zao.

Amesema Serikali imekuwa ikifanya kila jitihada kuhakikisha huduma ya maji inawafikia wananchi kama inavyotakiwa lakini kuna baadhi ya watendaji hawatimizi majukumu yao vizuri.

Serikali inatumia fedha nyingi sana katika kutekeleza miradi lakini miradi hiyo haifanyi kazi kwa uzembe wa watendaji katika kusimamia miradi hiyo, nataka kila mmoja afanye kazi kwa weredi mkubwa ili wananchi wapate huduma za maji

Mhe. Majaliwa.

Waziri Mkuu Majaliwa pia amezitaka mamlaka za maji kwenda kusimamia ipasavyo ukusanyaji wa ankara za maji ili kuwezesha mamlaka hizo kuendelea kujiendesha bila hasara huku zikizingatia sheria bila kuwabambikizia Ankara watumiaji wa maji kwani kuna malalamiko mengi sana.

Ameongeza kuwa “mkahamasishe watu kulipa ankara za maji na h ii sio kwa wananchi tu hata kwenye taasisi za serikali zote zilipe bili yeyote anayetumia maji lazima alipe ankara za maji mkasimamie hilo, pia tumepiga marufuku ukataji wa maji siku za wikendi au siku kuelekea wikendi” amesema.

Aidha ameitaka EWURA kwenda kusimamia uboreshwaji wa huduma za maji na kujenga utaratibu wa kufuatilia uboreshaji wa sera na kanuni katika kuhakikisha wananchi wanapata huduma bora za maji ipasavyo na kufuatilia tatizo la ucheleweshwaji wa miradi ya maji.

Awali, Waziri wa Maji Mhe. Jumaa Aweso amesema wao kama Wizara watahakikisha wanafanya kazi usiku na mchana kuhakikisha wananchi wanapata huduma bora za maji na hawatamvumilia mtu yeyote atakayekwenda na kutaka kurudisha nyuma jitihada hizo.

Kwa upande wake Kaimu Mkurugenzi Mkuu wa EWURA Mhandisi Godfrey Chibulunje akitoa taarifa kuhusu ripoti hiyo amesema ripoti hiyo itasaidia katika kuimarisha utendaji kazi kwa Mamlaka zote na watakuwa wakitoa ripoti ya tathmini iliyofanyika ya utendaji wa kila Mamlaka katika mamlaka za Mikoa na miradi ya kitaifa na mamlaka za miji midogo na Wilaya.

Amesema wamefanya tathmini ya utendaji wa kila mamlaka na kupata Mamlaka zilizofanya vizuri katika kutoa huduma katika makundi ambapo kwa kundi la usimamizi wa miradi ya kitaifa aliyeibuka mshindi ni KASHWASA, Mamlaka za Mikoa ni Mamlaka ya Mkoa wa Moshi na Mamlaka za miji na Wilaya ni Bihalamuro ambazo zimezawadiwa shilingi milioni 21 kila mmoja ambazo watazitumia katika kununua dira za maji.