PROF MKENDA ATAKA MASHAMBA 13 YA MBEGU KUFUFULIWA

📌HAPPINESS MTWEVE

WAZIRI wa Kilimo, Profesa Adolf Mkenda amewaagiza  wakala wa mbegu Bora za kilimo nchini(ASA) kuhakikisha wanafufua mashamba yote 13 ya uzalishaji wa mbegu ambayo yamegeuzwa kuwa mapori.

Amesema endapo mashamba hayo yatafufuliwa na kuendelea na uzalishaji wa mbegu wenye tija itasaidia kuipinguzia serikali mzigo na gharama ya kununua na kuagiza mbegu nje ya nchi.

Profesa Mkenda ametoa agizo hilo jijini Dodoma leo wakati akizungumza na wajumbe wa bodi na Menejimenti ya ASA iliyoambatana na utoaji wa vyeti vya shukrani kwa wajumbe wa bodi wanaomaliza muda wake.

Waziri amefafanua kuwa itakuwa ni ajabu kuzuia wananchi kuvamia mashamba hayo na kuyatumia wakati mashamba hayo yamekaa tu hayatumiki na kuwa kama yametelekezwa.

Akizungumzia changamoto wanazokumbana nazo ASA Mwenyekiti wa bodi ya ASA Dk.Ashura Kihupi amesema wanakabiliwa na ufinyi wa bajeti hivyo kushindwa kuendeleza mashamba hayo hivyo kujikuta wakiyaacha bila kuyatumia na kuwa mapori.

"Gharama za kuendesha mashamba hayo ni kubwa ikiwemo vitendea kazi na rasilimali watu ya kutosha, kwa Sasa tuna watumishi 150 huku mahitaji yakiwa 204, idadi hiyo haitoshi,"amesema Ashura.

Kuhusu agizo la waziri la kufufua mashamba amesema ASA peke yake hawataweza kwani kwasasa mashamba yanayotumika ni 8 tu kati ya 13 yaliyopo, kwa kuwabserikali itaingilia Kati tunaamini itaongeza bajeti ili kufanikisha hilo na mashamba mengine watayakodisha kwa wawekezaji hivyo kufanya mashamba yote kufufuliwa.