WAKAZI WA DODOMA WAHIMIZA WAZANZIBAR KUTUMIA VYEMA UHURU WALIOUPATA

 

 

📌DEVOTHA SONGORWA.

 Baadhi ya wakazi wa jiji la Dodoma wamesema juhudi za wapigania Uhuru wa Zanzibar zinapaswa kuenziwa kwani ni  sehemu ya Zanzibar ya leo.

 Kufuatia Zanzibar kupata Uhuru wake kumeijengea uwezo Serikali ya Mapinduzi ya Zanzibar katika kutoa huduma bora za Kijamii kwa Wananchi wote bila ya Ubaguzi.

 Wakizungumza jana na mtandao huu ikiwa ni maadhimisho ya miaka 57 ya mapinduzi matukufu ya Zanzibar ambayo hufanyika kila mwaka yalifanyika katika viwanja vya mnazi mmoja mjini Zanzibar mgeni rasmi akiwa ni Rais wa Zanzibar, Dk.Hussein  Mwinyi.

 Wananchi hao walieleza kuwa kupatikana kwa  Uhuru kumeleta mabadiliko makubwa kwa raia wenyewe na Taifa kwa ujumla.

 Husna Rashid ambaye ni mkazi wa Mnada Mpya alieleza kwamba miaka 57 ya Mapinduzi ya Zanzibar imekuwa na mageuzi makubwa katika maendeleo kwani waasisi wake waliacha alama ya mfano katika Taifa hilo ikiwemo amani na utulivu.

 "Leo Wazanzibar Wana amani na utulivu kwa sababu ya walitangulia walihatarisha maisha yao kukomboa Taifa kutoka kwa watawala niombe tudumishe tunu hii muhimu kwetu na watumie Maadhimisho haya kwa mrengo chanya,"alisema Husna.

 Akizungumzia nyanja ya maendeleo John Litware mkazi wa Viwandani alipongeza hatua hiyo akisema kuwepo kwa Uhuru kumeifanya Zanzibar kujitegemea na kujisimamia katika mambo yake ili kuwaletea wananchi maendeleo.

 " Unajua hakuna maendeleo katika utumwa leo hii Zanzibar inajitawala yenyewe hii inaonyesha kabisa msingi mkubwa uliojengwa na wapigania uhuru tunaona huduma nyingi zimeboreshwa ikiwemo afya, elimu,miundo mbinu na ushirikiano mkubwa na Tanzania Bara,"alipongeza Litware.

 Sherehe za Maadhimisho hayo zimehudhuriwa na viongozi mbalimbali akiwemo Makamu wa Rais Samia Suluhu Hassan,viongozi wa dini na vyama yakiambatana na  na shamra shamra mbalimbali kama hatua ya kuenzi mema yaliyofanywa na waasisi wa Uhuru wa Taifa hilo.

 Mapinduzi ya Zanzibar yalitokea mwaka Januari 12, 1964 ili kumuondoa madarakani Sultani wa Zanzibar na serikali yake, iliyoundwa hasa na Waarabu, na hatimaye kuweka uongozi mikononi mwa Waafrika.

 Aidha historia inaonyesha kuwepo kwa sababu nyingi za kufanyika kwa mapinduzi ya kulikomboa Taifa hilo kutoka mikononi wa waingereza kiuchumi,kijamii na kisiasa na kupinga ubaguzi na Sasa ni NChi huru na watu wake.