WAWEKEZAJI, WEKEZENI KWENYE SEKTA YA ELIMU.

 

📌Na JASMINE SHAMWEPU.

MKUU wa Wilaya ya Dodoma, Bw Josephat Maganga amewataka wawekezaji kujitokeza kwa wingi kuja kuweza kwenye sekta ya elimu jijini Dodoma,kutokana na mahitaji makubwa ya shule za kisasa na ubora wa kimataifa uliopo:

Maganga,ameyasema hayo wakati akizungumza na wazazi pamoja na viongozi mbalimbali katika sekta ya elimu kwenye Mahafali ya kwanza ya shule ya awali na msingi ya Ellen White, iliyopo Nzuguni jijini Dodoma.

Amesema,kutokana na serikali kuhamia Dodoma hivi sasa mahitaji ya shule yameongezeka kutokana na idadi kubwa ya watu walipo.

“Tunawakaribisha sana wawekezaji maeneo bado yapo mengi kwa ajili ya kufanya uwekezaji hivyo niwaombe waje kwa wingi ili wawekeze katika sekta ya elimu”amesema Mganga

Aidha, amesema katika jitihada za kukuza elimu katika Wilaya ya Dodoma mikakati iliyopo ni kujenga madarasa, nyumba za walimu mabweni pamoja na kuboresha miundombinu mingine ya elimu.

“Pamoja na jitihada hizo lakini niwatake walimu, waratibu elimu kata pamoja na maafisa elimu kila mmoja atimize wajibu wake ili kuhakikisha kuwa jiji la Dodoma elimu inakuwa”amesema Maganga

Mwenyeki wa Kamati ya shule hiyo Mchungaji David Mbaga, amesema kuwa lengo la shule hiyo ni kuhakikisha kuwa inatoa elimu bora ambayo itawawezesha wahitimu kuwa na uwezo wa kujitegemea.

Mkurugenzi wa shule hiyo Simon Ikwabe, amesema kuwa malengo ya shule hiyo ni kuwa ya mfano nchini katika utoaji wa elimu bora inayowawezesha wahitimu kuweza kujitegemea.