TAWA YAZINDUA DUKA LA KWANZA LA UUZAJI NYAMA ZA WANYAMAPORI TANZANIA.

 

📌FAUSTINE GIMU .

MAMLAKA ya Usimamizi wa Wanyamapori nchini (TAWA)imezindua Duka la kwanza hapa nchini litakalokuwa likijihusisha na uuzaji wa  nyama zitokanazo na wanyamapori .

Akizungumza katika uzinduzi wa  duka hilo la Wanyamapori  Disemba  20,2020 katika mtaa Kishoka kata ya Chang’ombe jijini Dodoma,Mwenyekiti wa  Bodi Mamlaka ya Usimamizi wa Wanyamapori(TAWA)Meja Jenerali Mstaafu  Khamis Semfuko amesema lengo la kufungua duka hilo la wanyamapori ni katika kutekeleza agizo la Rais wa Jamhuri ya Muungano wa Tanzania Dkt.John Pombe Magufuli katika kuhakikisha Watanzania wananufaika na rasilimali za  Tanzania.

  Lazima tuanzishe Maduka ya kuuza wanyamapori katika maeneo mengi na hapa nimekuja kufungua duka letu la kwanza la uuzaji wa wanyamapori ili kutekeleza amri hiyo ya Amiri Jeshi wetu.

Meja Jen (Mstaafu) Semfuko 

 

Aidha,Jenerali Semfuko amebainisha kuwa  wanyamapori watapatikana kwa njia ya vibali maalum ya uwindaji,kwa wawindaji  wa  kitalii,na kwa wananchi wenyewe watakaoanzisha Lanchi za kufuga wanyamapori ambapo  ameahidi kuwa TAWA ipo tayari kuwapatia Mitamba ya uanzishaji ufugaji wanyamapori.

Pia,amebainisha kuwa Mabucha ya wanyamapori yatapatikana katika maeneo mbalimbali nchini huku ujangili wa wanyama utaendelea kuthibitiwa na usafi  utazingatiwa na utaratibu wa uanzishaji wa mabucha ya wanyamapori upo wazi  .

Wadau wa biashara ya nyamapori wakiwa katika picha ya pamoja
na maafisa wa TAWA mara baada ya uzinduzi wa duka la nyama
 pori jijini Dodoma

Kaimu Kamishna wa Uhifadhi kutoka Mamlaka ya Usimamizi wa wanyamapori Tanzania(TAWA)Mabula Misungwi Nyanda amesema Bucha  la nyama za  Wanyamapori lililozinduliwa limetokana na wanyama waliowindwa  huku akitoa wito kuwa ukitaka kula nyamapori lazima uijue TAWA kwani ni Msimamizi mkuu wa wanyamapori katika masuala ya uvunaji.

Wananchi wa Mtaa  Kishoka Mtaa kata ya Chang’ombe jijini Dodoma akiwemo Mwenyekiti wa mtaa huo Juma Maulid,na Mariam Juma Damas wameelezea kufurahishwa kwao kuanzishwa kwa bucha la nyamapori kwani itawarahisishia kupata nyama kiurahisi.